ഇന്ത്യയിലെ ഏക വിദ്യാഭ്യാസ റിയാലിറ്റിഷോ
കേരളത്തിലെ പൊതുവിദ്യാലയങ്ങളുടെ അക്കാദമിക മികവും സാങ്കേതിക-കലാ-കായിക-ശാസ്ത്ര നേട്ടങ്ങളും ലോകത്തിന് മുന്നിൽ അവതരിപ്പിക്കുന്ന ഇന്ത്യയിലെ ഏക വിദ്യാഭ്യാസ റിയാലിറ്റിഷോ ആയ ‘കൈറ്റ് ഹരിതവിദ്യാലയം 4.0’ ജനുവരി 9 മുതൽ കൈറ്റ് വിക്ടേഴ്സ് ചാനലിൽ സംപ്രേഷണം ആരംഭിക്കുന്നു. ഒരു ദിവസം രണ്ട് സ്കൂളുകൾ വീതമുള്ള രണ്ട് എപ്പിസോഡുകളായി റിയാലിറ്റിഷോയുടെ ആദ്യ സംപ്രേഷണം വൈകുന്നേരം 7 മണിയ്ക്കാണ്. തൊട്ടടുത്ത ദിവസം രാവിലെ 7.00 മണിക്കും ഉച്ചയ്ക്ക് 1 മണിയ്ക്കും പുനഃസംപ്രേഷണം ഉണ്ടാകും. കൈറ്റ് വിക്ടേഴ്സിന്റെ പോർട്ടൽ വഴിയും മൊബൈൽ ആപ്പ് വഴിയും തത്സമയം കാണാം. youtube.com/itsvicters യുട്യൂബ് ചാനലിലാണ് എപ്പിസോഡുകൾ പിന്നീട് ലഭ്യമാകുക. ഓൺലൈനായി അപേക്ഷ സമർപ്പിച്ച 825 സ്കൂളുകളിൽ നിന്ന് ഹൈസ്കൂൾ-ഹയർസെക്കന്ററി വിഭാഗത്തിൽ 46ഉം പ്രൈമറി-അപ്പർ പ്രൈമറി വിഭാഗത്തിൽ 40 ഉം സ്കൂളുകളുമാണ് ഹരിതവിദ്യാലയം റിയാലിറ്റിഷോയിൽ മാറ്റുരയ്ക്കുക.
