ചില തെലുഗു മൊഴിമാറ്റ ഗാനങ്ങളിലൂടെ
***********
തമിഴ് കഴിഞ്ഞാൽ ദക്ഷിണേന്ത്യയിൽ ഏറ്റവും പ്രാചീന സംസ്ക്കാരമുള്ള ഭാഷയാണ് തെലുഗു .
പുണ്യപുരാണ സിനിമകളും രാജാപ്പാർട്ട് ചിത്രങ്ങളും
മാന്ത്രിക സിനിമകളുമായിരുന്നു തെലുഗുസിനിമയുടെ മുഖമുദ്ര.
ഇന്ന് സ്റ്റീഫൻ സ്പിൽബെർഗ് ഹോളിവുഡ് സിനിമകളിൽ കാണിക്കുന്ന ദൃശ്യവിസ്മയങ്ങൾ ഒരുകാലത്ത് തെലുഗു സിനിമയിൽ പരീക്ഷിച്ച് പ്രേക്ഷകരെ അത്ഭുതപ്പെടുത്തിയ വ്യക്തിയാണ് വിടലാചാര്യ .
പാതാളഭൈരവി ,
ജഗദ്മോഹിനി തുടങ്ങിയ അദ്ദേഹത്തിന്റെ തെലുഗു ചിത്രങ്ങൾ പ്രേക്ഷകർ ആവേശപൂർവ്വമാണ് ഇന്നും ഓർക്കുന്നത്.
ഈ ചിത്രങ്ങളെല്ലാം തന്നെ തമിഴിലേക്ക് മൊഴിമാറ്റം ചെയ്യപ്പെടുകയും ഇവയെല്ലാം ഒരുകാലത്ത് കേരളത്തിൽ
വൻ പ്രദർശന വിജയം നേടുകയും ചെയ്തു .
ഭക്തപ്രഹ്ലാദ, വീരാഭിമന്യു , ദേവദാസ് ,പാതാളഭൈരവി ,
വാത്മീകിരാമായണം ,
മായാബസാർ
തുടങ്ങി കേരളത്തിൽ പ്രദർശനവിജയം നേടിയ
ഈ ചിത്രങ്ങളെല്ലാം തെലുങ്കിൽ നിന്നും തമിഴിലേക്ക് എത്തിയവരായിരുന്നു.
ദേശീയ പ്രശസ്തി നേടിയ ശങ്കരാഭരണത്തിന് മുൻപ് തെലുങ്കിൽ നിന്നും നേരിട്ട് മലയാളത്തിലെത്തി
വിജയം വരിച്ച രണ്ടു ചിത്രങ്ങളെക്കുറിച്ചാണ് ഇന്നത്തെ പാട്ടോർമ്മയിൽ പരാമർശിക്കുന്നത്.
നമ്മുടെ പ്രിയനടി ഉർവ്വശി ശാരദയുടെ ഭർത്താവ്
“ഛലം ” നായകനായി അഭിനയിച്ച
“ബുല്ലമ്മ ബുല്ലോടു “എന്ന തെലുങ്ക് ചിത്രം മലയാളത്തിലേക്ക് എത്തുന്നത് 1974 -ലാണ്.
പേര് “അരമനരഹസ്യം. ”
ഈ സിനിമയിലെ
“കുളിർ ചിന്തും മഴയിൽ
ഞാൻ കണ്ട മിന്നൽ
നിൻ നോട്ടം താനല്ലയോ …”
“നീ പാപം ചെയ്തവനല്ലേ
നിൻ പാടവമെല്ലാമെവിടെ …..”
എന്നീ ഗാനങ്ങൾ ഹിറ്റായിരുന്നുവെങ്കിലും
ഇതിന്റെ അണിയറ
ശില്പികളെക്കുറിച്ചുള്ള മറ്റു വിവരങ്ങളൊന്നും ഇപ്പോൾ ലഭ്യമല്ല.
പിന്നീട് കമലഹാസനും സരിതയും നായികാനായകൻമാരായി അഭിനയിച്ച കെ.ബാലചന്ദറിന്റെ “മരോചരിത്ര ” എന്ന തെലുങ്ക് സിനിമയും മലയാളത്തിലേക്ക് മൊഴിമാറ്റം ചെയ്യപ്പെട്ട് എത്തിയിരുന്നു.
കമലഹാസൻ അക്കാലത്ത് മലയാളികളുടെ പ്രിയപ്പെട്ട നടനായിരുന്നതിനാൽ
“തിരകൾ എഴുതിയ കവിത ” എന്ന പേരിൽ പുറത്തിറങ്ങിയ ഈ ചിത്രം നല്ല പ്രദർശനവിജയം നേടിയെടുത്തു.
എം എസ് വിശ്വനാഥനായിരുന്നു ചിത്രത്തിന്റെ സംഗീത സംവിധായകൻ .
മലയാളത്തിൽ പാട്ടുകൾ എഴുതിയത് അടുത്തിടെ അന്തരിച്ച മങ്കൊമ്പ് ഗോപാലകൃഷ്ണൻ.
“അറിയാത്ത പുഷ്പവും അകലത്തെ പൂന്തേനും …”
( ജയചന്ദ്രൻ )
“പതിനേഴാം വയസ്സിൽ … ”
(എസ് ജാനകി )
“ഹലോ ഡാർലിംഗ്
നീ എൻ ലഹരി …. ”
(എസ്.പി. ബാലസുബ്രഹ്മണ്യം )
“ബലേ ബലേ
ആസാമി നീ …. ”
( എം എസ് വിശ്വനാഥൻ – എൽ.ആർ. ഈശ്വരി )
എന്നിവയായിരുന്നു ചിത്രത്തിലെ ഹിറ്റ് ഗാനങ്ങൾ .
ഈ ചിത്രം പിന്നീട്
“ഏക് ദുചേ കേ ലിയേ ” എന്ന പേരിൽ ഹിന്ദിയിലും റീമേക്ക് ചെയ്തിരുന്നു .
കമലഹാസനും,
കെ ബാലചന്ദറും,
എസ് പി
ബാലസുബ്രഹ്മണ്യവുമൊക്കെ ഉത്തരേന്ത്യക്കാർക്ക് പ്രിയപ്പെട്ടവരായത് ഈ ചിത്രത്തിലൂടേയാണ്.
“തിരകൾ എഴുതിയ കവിത ” യിലൂടെ അരങ്ങേറ്റം നടത്തിയ മറ്റൊരു നടി മാധവി ആയിരുന്നു.
ആകാശദൂതിലൂടെയും വടക്കൻ വീരഗാഥയിലൂടേയും മലയാളികളെ വിസ്മയിപ്പിച്ച മാധവിയെ കണ്ടെത്തിയത്
കെ ബാലചന്ദ്രർ എന്ന തമിഴിലെ പ്രശസ്ത സംവിധായകനാണ്.
കാതോട് കാതോരം, സന്ദർഭം തുടങ്ങിയ പ്രശസ്ത ചിത്രങ്ങളിൽ നായികയാവുകയും പിന്നീട് പ്രശസ്ത നടൻ മുകേഷിന്റെ ഭാര്യയാവുകയും ചെയ്ത സരിതയുടെ ആദ്യ ചിത്രവും
” തിരകൾ എഴുതിയ കവിത ” യായിരുന്നു.
മൊഴിമാറ്റ ഗാനങ്ങളെക്കുറിച്ചുള്ള കുറിപ്പുകൾ അവസാനിക്കുന്നില്ല.
അവ മറ്റൊരു ലേഖനത്തിൽ …
(സതീഷ് കുമാർ വിശാഖപട്ടണം
പാട്ടോർമ്മകൾ @ 365 )
